Me golat e Mbeumo dhe Dorgu në pjesën e dytë, Manchester United fitoi derbin e Mançesterit në Old Trafford, në ndeshjen e parë të Michael Carrick si trajner në stol. Një debutim “ëndrrash” në “Theatre of Dreams”: Carrick mori drejtimin e ekipit këtë javë deri në fund të sezonit dhe u fut menjëherë në ritëm ndaj rivalëve të qytetit.
United e nisi takimin me më shumë intensitet dhe direktësi, ndërsa City tentoi të merrte kontrollin me posedim, por pa krijuar rrezik real. Rastet e pastra ishin të pakta. Mundësia më e mirë e pjesës së parë erdhi shumë herët: në minutën e 3-të, Maguire kërceu mbi Haaland dhe goditi me kokë pas një goditjeje këndi, por topi u përplas në traversë. Më pas, United pati dy gola të anuluar për pozicion jashtë loje, me Fernandes dhe Diallo të përfshirë në aksionet që nuk u vlefshmuan.
Pas pushimit, City mbajti më shumë topin, por rastet më të qarta vazhduan t’i kishte United, që po fitonte besim me kalimin e minutave dhe me mbështetjen e tifozëve. Donnarumma u detyrua të ndërhynte disa herë, duke ndalur një goditje të Diallo dhe më pas rikthimin e Casemiro në të njëjtin aksion, ndërsa edhe Mbeumo pati një shans në shtyllën e dytë.
Goli i parë erdhi në minutën e 65-të dhe ishte rezultat i një kundërsulmi të shpejtë: City fitoi një goditje dënimi pranë zonës së United, por vendasit ia morën topin dhe u hodhën menjëherë përpara me katër sulmues ndaj dy mbrojtësve. Fernandes e shpërndau në zonë te Mbeumo, i cili goditi ulët në diagonale dhe e dërgoi topin në rrjetë. City humbi shkëndijën që i kishte mbetur: pa Foden, me Haaland thuajse të padukshëm dhe me Doku e Semenyo që provuan pa sukses, ekipi i Guardiolës u duk i pafuqishëm.
Në minutën e 76-të, një tjetër gabim i mbrojtjes së City-t vulosi ndeshjen. Dorgu u shkëput mes tre mbrojtësve që mbetën duke parë krosimin e Cunha nga e djathta dhe e shtyu topin në rrjetë, duke e çuar rezultatin në 2-0. Një goditje e rëndë për City-n, që vazhdon të ngecë në garën për titull, ndërsa United, pas një starti të lëkundur dhe largimit të Amorim, sheh veten sërish në betejë për vendet e Champions League.
