Dayot Upamecano është vetëm një hap larg nënshkrimit të kontratës së re me Bayern Munich, duke mbyllur çdo spekulim për një largim të mundshëm. Kontrata aktuale e 27-vjeçarit skadon në qershor 2026, por palët tashmë janë shumë pranë marrëveshjes së re.
Drejtori sportiv i klubit, Christoph Freund, konfirmoi për mediat se bisedimet po ecin shumë mirë:
“Po zhvillojmë diskutime intensive dhe shumë konstruktive. Upa ndihet shumë mirë tek ne. Jemi pozitivë; s’ka rëndësi nëse nënshkrimi vjen një ditë më herët apo më vonë – e rëndësishme është që do të ndodhë.”
Upamecano po zhvillon një sezon solid me Bayernin, me 20 paraqitje dhe një gol të shënuar në të gjitha kompeticionet. Ai ka spikatur jo vetëm në fazën mbrojtëse, por edhe në ndërtimin e lojës. Sipas Transfermarkt, vlera e tij aktuale në treg është rreth 60 milionë euro.
Me rinovimin që po afron, Bayern siguron një nga shtyllat kryesore të mbrojtjes për të ardhmen.
