Karim Adeyemi mund të jetë pranë një largimi surprizë nga Borussia Dortmund — dhe arsyeja, sipas raportimeve, nuk lidhet me futbollin, por me jetën personale dhe partneren e tij, Loredana Zefi.
Sipas BILD, 23-vjeçari u ka bërë të ditur drejtuesve të Dortmundit se dëshiron të largohet dhe të transferohet te një klub që ndodhet në një qytet të madh europian. Motivimi kryesor, thuhet, vjen nga dëshira e Loredanës për të jetuar në një metropol europian dhe jo në Dortmund.
Në këtë kontekst, Adeyemi raportohet se ka ndërruar agjent dhe ka nisur të rishikojë kontratën me klubin gjerman, duke kërkuar mundësi që t’i hapin rrugë largimit madje që në merkaton e janarit.
Më herët, mediat kanë përmendur interesim nga gjigantë të Premier League si Arsenal dhe Manchester United, të cilët e shohin Adeyemin si një profil ideal për krahun e sulmit.
Adeyemi u transferua te Borussia Dortmund në vitin 2022 nga Salzburg për 30 milionë euro. Me verdhezinjtë ka regjistruar 128 ndeshje, ku ka shënuar 32 gola dhe ka dhënë 22 asistime. Kontrata e tij është e vlefshme deri në 2027, ndërsa vlera e tij në treg, sipas Transfermarkt, vlerësohet rreth 60 milionë euro.
