Ish-deputeti Dashnor Sula ka marrë zyrtarisht detyrën e Kryeinspektorit të Përgjithshëm më 30 tetor. Në fjalën e tij të parë pas emërimit, ai e cilësoi këtë moment si një sfidë të rëndësishme personale dhe profesionale.
Sula theksoi se çdo funksion publik ka përgjegjësi të qarta ligjore, të cilat duhet të përmbushen me korrektësi, duke e parë këtë rol si një mundësi për të kontribuar në zhvillimin e vendit. Ai garantoi një komunikim të hapur dhe të drejtpërdrejtë me të gjithë ata që kanë nevojë për informacion apo ndihmë.
“Do të kem një raport të drejtpërdrejtë me këdo që ka nevojë për mbështetje,” u shpreh Sula, duke nënvizuar angazhimin e tij të plotë në ushtrimin e detyrës, përfshirë takime të rregullta me ministren përgjegjëse dhe kryeministrin.
Ai deklaroi gjithashtu gatishmërinë për bashkëpunim të ngushtë me përfaqësuesit politikë dhe institucionalë, duke theksuar se do të jetë në dispozicion 24 orë në ditë për shqetësimet e qytetarëve. “Nuk duhet ta shohim njëri-tjetrin si armiq, por si partnerë në përpjekjen për ta ndihmuar Shqipërinë të ecë përpara,” përfundoi Sula, duke bërë thirrje për një bashkëpunim konstruktiv.
