Cristiano Ronaldo po hedh një hap të rëndësishëm drejt jetës pas futbollit, duke shpallur krijimin e një klubi privat ekskluziv në Madrid, të quajtur “Vega”. Sipas mediave spanjolle, ky është investimi më i ri i yllit portugez, që po i afrohet fundit të një karriere të jashtëzakonshme sportive.
Ronaldo ka bashkëpunuar me Íñigo Onieva dhe kompaninë Mabel Hospitality për të ndërtuar një ambient elitë, ku luksi dhe eleganca do të jenë elementi kryesor. Klubi do të ofrojë një atmosferë të qetë dhe të rafinuar gjatë ditës, ndërsa në mbrëmje do të shndërrohet në një hapësirë sociale të nivelit të lartë, me darka ekskluzive dhe bare të dedikuara për anëtarët.
Anëtarësimi në “Vega” do të ketë disa nivele. Paketa më prestigjioze, “Founders’ Membership”, do të ofrohet vetëm me ftesë dhe përfshin një tarifë të vetme prej 13,000 £, që garanton anëtarësi të përhershme dhe prioritet në rezervime. Anëtarësimi lokal do të kushtojë mbi 2,000 £ në vit, me një tarifë fillestare prej 1,750 £. Për personat nën 35 vjeç, tarifa vjetore do të jetë rreth 1,300 £, ndërsa çiftet do të paguajnë afërsisht 1,750 £ çdo vit.
Ky projekt tregon se Ronaldo po ndërton me sukses një portofol të fuqishëm biznesesh jashtë futbollit, duke ruajtur njëkohësisht nivel të lartë performance në fushë. Ai vazhdon të jetë ndër lojtarët kryesorë të Al-Nassr në Saudi Pro League dhe po përgatitet për fazën e fundit të karrierës ndërkombëtare në Kupën e Botës. Portugalia do të jetë pjesë e shortit final më 5 dhjetor, ku Ronaldo synon të fitojë trofeun që ende i mungon.
Në një intervistë të fundit me Piers Morgan, Ronaldo foli me emocion për periudhën që e pret pas futbollit. “Së shpejti. Do të jetë e vështirë, me siguri do të qaj,” u shpreh ai, duke theksuar se është përgatitur për këtë moment që nga mosha 25–27 vjeç. Me këtë qasje, ai tregon se është gati të përballojë sfidat e kapitullit të radhës në jetën e tij.
