Mbrëmja Gala “Topi i Artë 2025” do të mbahet sonte në Teatrin e Operas dhe Baletit, ku do të nderohen protagonistët e futbollit shqiptar për vitin 2025. Federata Shqiptare e Futbollit ka parashikuar të shpërndajë në total 9 trofe, përfshirë çmimet për talente (djem e vajza), golashënuesit më të mirë, trajnerin e vitit, arbitrin e vitit dhe 11-shen më të mirë të kampionatit. Po ashtu, dy çmime do t’u akordon futbollistëve të Kombëtares shqiptare: “Zemra Kuqezi” dhe “Lojtari i vitit i Kombëtares”.
Fituesi i çmimit “Zemra Kuqezi” do të përcaktohet nëpërmjet një votimi online të tifozëve, ndërsa për “Lojtarin e vitit” do të votojnë vetë futbollistët e ekipit kombëtar. Të dyja çmimet do të shpallen mbrëmjen e sotme. Ceremonia do të sjellë edhe prezencën e personaliteteve nga bota e futbollit, për të nderuar më të mirët. Një nga yjet e kësaj nate do të jetë Esteban Cambiasso, ish-lojtar argjentinas i ekipeve si Inter dhe Real Madrid, i cili do të dorëzojë trofeun “Këpuca e Artë”. Gjatë karrierës së tij, Cambiasso fitoi 21 tituj, përfshirë pesë Scudetto dhe Champions League në 2010.
Cambiasso ishte gjithashtu anëtar i Kombëtares argjentinase nga viti 2000 deri në vitin 2011, duke marrë pjesë në ngjarje të rëndësishme si Kupa e Botës 2006 dhe Kupa e Konfederatave 2005. Për më tepër, ai ka qenë gjithashtu një nga emrat e përfolur për të drejtuar Kombëtaren shqiptare para emërimit të trajnerit aktual, Sylvinho.
Po ashtu, në këtë ceremoni pritet të jetë i pranishëm Gianlucca Rocchi, një nga arbitrët më të njohur në botë, i cili ka pasur një karrierë të suksesshme në gjykimin e ndeshjeve europiane dhe botërore për 17 vite, ku 10 nga ato vitet i ka kaluar në kategorinë Elite të arbitrave të FIFA-s. Kjo mbrëmje pritet të jetë një festë për futbollin shqiptar, duke sjellë në vëmendje arritjet dhe kontribuesit e tij.
