Kryeministri Edi Rama nuk i ka lënë pa përgjigje as kësaj radhe komentuesit e rrjeteve sociale ku në fokus ka qenë ulja e çmimit të energjisë me 1 lekë, nga 9.6 lekë, në 8.5 lekë.
Gjatë ditës së sotme ai ka zgjedhur t’i përgjigjet një tjetër komentuesi në Facebook, i cili shkruan se çmimi i energjisë duhet të ulet me shumë pasi në Shqipëri kemi standart të dyfishtë, rrogat e Afrikës dhe çmimet e Europës.
“Po e prodhojmë vetë energjinë o Ed. Duhet me e ul shumë më tepër, kemi çmimet e Europës dhe rrogat e Afrikës”, shkruan komentuesi në Facebook.
Në përgjigje të këtij komenti, Edi Rama tha se Shqipëria arrin të prodhojë vetë vetëm 75% të energjisë elektrike në vitin më të mirë dhe vetëm 65% në vitin më të thatë.
Ndër të tjera kryeministri thotë se ndihet tepër krenar për këtë arritje të qeverisë pasi është çmimi më i ulet për vendin i arrirë ndonjëherë. Gjithashtu ai shton se ulja e çmimit të energjisë në Shqipëri, është e para në rajon pas krizës së luftës në Ukrainë.
“Kjo është një legjendë mediatike pa asnjë lidhje me realitetin. Shqipëria prodhon 75% energji në vitin mirë të mirë hidrik dhe vetëm 65% kur ka vit të thatë. Por ne do ta prodhojmë të gjithë energjinë për nevojat tona brenda vitit 2030, kur do kemi fituar sovranitetin energjetik me prodhim nga dielli dhe nga era.
Ulja me 10.5% e çmimit të energjisë është historike, e para se është e para ulje në 35 vjet dhe është e vetmja ulje e bërë në këtë pjesë të botës pas krizës së luftës në Ukrainë. Është fryt e një arritje historike të sektorit në dekadën e fundit.
Është 10.5% ulje dhe është faktikisht çmimi më i ulët i energjisë në histori, prandaj jam shumë krenar që e arritëm këtë kur mendoj se u nisëm nga buza e humnerës. Edhe një herë jo, ne nuk e prodhojmë vetë për të gjitha nevojat tona energjinë, kjo është legjendë mediatike. Po kemi bërë shumë më tepër se ç’kishim,” është shprehur Edi Rama.
