Chelsea po përgatitet të trokasë sërish në derën e Barcelonës. Pas tentativës së dështuar për të transferuar Fermin Lopez verën e kaluar, Blutë e Londrës kanë vënë tani në shënjestër një tjetër talent të katalanasve — mesfushorin Marc Casado.
Sipas raportimeve të Daily Briefing, Chelsea është gati të paraqesë një ofertë prej rreth 35 milionë eurosh për 21-vjeçarin, me shpresën për të bindur Barcelonën që ta lërë të lirë. Casado, i rritur në akademinë legjendare “La Masia”, ka filluar të fitojë besimin e trajnerit Hansi Flick dhe shihet si pjesë e së ardhmes së skuadrës blaugrana.
Megjithatë, kalimi i tij në “Stamford Bridge” nuk do të jetë i lehtë. Barcelona, pavarësisht problemeve financiare, e konsideron Casadon një lojtar me potencial të madh dhe pjesë të projektit afatgjatë të klubit.
Në krahun tjetër, Chelsea po kërkon të rinovojë mesfushën me futbollistë të rinj dhe me energji, dhe Casado shihet si një investim ideal për të ardhmen e londinezëve.
Mbetet për t’u parë nëse oferta e Blutë do të jetë e mjaftueshme për të tunduar Barcelonën dhe për të hapur rrugën e një tjetër transferimi të bujshëm mes Premier League dhe La Ligës.
