Chelsea arriti të sigurojë një vend për në Champions League për sezonin e ri vetëm në javën e fundit, ku fitoi në transfertë 0-1 ndaj rivalit direkt Nottingham Forest dhe duke e mbyllur përfundimisht në vendin e katërt.
Për të “festuar” kualifikimin në Champions, drejtuesit e Chelsea-s po mendojnë t’i bëjnë “dhuratë” trajnerit Enzo Maresca, një nga sulmuesit më të mirë në qarkullim. “The Athletic” raporton se Chelsea është vënë në ndjekje të sulmuesit francez të Eintracht Frankfurt, Hugo Ekitike.
22-vjeçari ka shënuar 22 gola në 45 ndeshje këtë sezon duke ngjallur interesin e shumë klubeve të mëdha, mes tyre edhe Chelsea. Me formën e treguar këtë sezon po ashtu është rritur edhe vlera në treg e sulmuesit francez.
Eintracht Frankufrt është i gatshëm të heq dorë prej tij, vetëm për shifrën 100 milionë euro, një shifër shumë e majme, por klubi i Bundesligës e justifikon këtë çmim me moshën e re të sulmuesit si dhe me pritshmëritë e mëdha ndaj tij.
Në anën tjetër, “Blutë e Londrës” mund të propozojnë një plan pagese të shpërndarë në kohë, siç kanë bërë edhe në marrëveshje të tjera më parë. Po ashtu para se të transferojnë Ekitike, Chelsea e ka të nevojshme të bëjë disa largime në repartin e sulmit, i cili është shumë i populluar, por këtë sezon nuk ka qenë aspak efektiv, ndaj kërkohet transferimi i një sulmuesi që të jetë i aftë të bëjë diferencën.
Kujtojmë se Chelsea nesër përballet me Betis në finalen e Conference League, një mundësi e mirë për ta mbyllur këtë sezon me trofe.
