Teksa politika është përfshirë në diskutime mbi një reformë të re territoriale, ekspertët rrahin ide të ndryshme, për mënyrën se si mund të konceptohet.
Të dhënat tregojnë se deri në vitin 2014 në vend numërohen 208 komuna, 65 bashki dhe 12 qarqe. Por me reformën territoriale të miratuar komunat u shkrinë dhe mbetën në fuqi 61 bashkia dhe 12 qarqe.
Ekspertja e çështjeve vendore, Adelina Farrici, thotë se reforma ka nevojë të rikonceptohet, për disa arsye.
“Ne sot kemi bashki që janë në pamundësi financiare, që janë të varura nga grantet e qeverisë. Bashkia quhet autonome kur të ardhurat e saj tejkalojnë grantin e qeverisë. Por sot vetëm 30-40 % e bashkive e tejkalojnë këtë tregues. Kjo është një problematikë që ka nevojë të riadresohet. Elementi i dytë që duhet të adresohet janë lëvizjet demografike. Ka shumë zona të cilat janë tkurrur në numrin e qytetarëve që jetojnë për shkak të emigrimit. Ndërsa elementi i tretë është ai i integrimit, ku shumë bashki duhet të përgatiten për sfidat që do të sjellë ky proces”, tha Farrici gjatë një intervistë për “E-ZONE”
Ende nuk ka një ide të qartë se sa bashki do të kemi me reformën e re që është në diskutim. Por sipas Farricit më shumë se sa numri i bashkive, fokusi duhet të jetë më shumë te shërbimet. Çdo qytetar ka nevojë të shërbehet me standard si në zona urbane ashtu edhe në zonën rurale. Sipas Farricit në fokus të reformës duhet të jetë edhe administrata e qarqeve.
“Duhet të rishihet modeli i qarqeve. Aktualisht ky model nuk është funksional. Si nivel i dytë i qeverisjes vendore nuk e kryejnë funksion ndaj qytetarëve, ndaj duhet të rikonceptohet funksioni i tyre”, tha Farrici.
