Gjatë ditës së sotme, vendi ynë do të ndikohet nga kushte atmosferike të paqëndrueshme. Moti parashikohet me vranësira mesatare deri në momente të dendura në pjesën më të madhe të territorit.
Reshjet e shiut do të jenë të herëpashershme dhe me intensitet të ulët, ndërsa në zonat jugore priten periudha afatshkurtra me reshje me intensitet deri mesatar, në formën e shtrëngatave.
Në zonën e Alpeve, si dhe në verilindje mbi 900–1000 metra dhe në juglindje mbi 1000–1100 metra mbi nivelin e detit, parashikohen reshje dëbore me intensitet të ulët dhe lokalisht mesatar, kryesisht në juglindje.
Era do të fryjë me drejtim juglindje–jugperëndim, me shpejtësi mesatare rreth 7 m/s, ndërsa përgjatë vijës bregdetare dhe në zonat luginore pritet të arrijë deri në 15 m/s. Valëzimi në det do të jetë i forcës 2–4 ballë.
Sa i përket temperaturave, maksimalet do të arrijnë deri në 14°C, ndërsa minimalet zbresin në 2°C në qytetin e Peshkopisë. Në Korçë dhe Bajram Curr, temperatura minimale do të shënojë rreth 3°C.
