Një fjalë e urtë shqiptare thotë “Ujku qimen e ndërron, por zakonin nuk e harron”.
E duket se kjo shprehje gjen mishërim në fshatin Lazarat, i njohur për kultivimin e kanabisit dhe rrezistencën e bërë ndaj policisë në momentin e ndërhyrjes.
Pas një periudhe të gjatë ku emri i Lazaratit nuk ishte më i lidhur me kultivimin e drogës, Policia e Gjirokastrës ka zbuluar sërish një rast të tillë në këtë zonë. Gjatë një kontrolli me dron mbi territorin e fshatit, u evidentuan disa bimë narkotike të llojit Cannabis Sativa në oborrin e një banese.
Si rezultat, u arrestua shtetasi Xh. Ç., 55 vjeç, i dyshuar për kultivim të paligjshëm të bimëve narkotike. Një pjesë e bimëve u sekuestrua si provë materiale, ndërsa pjesa tjetër u asgjësua me anë të djegies.
Policia bëri të ditur se ky rast u zbulua në kuadër të operacionit “Koordinata”, i cili synon parandalimin dhe goditjen e kultivimit të lëndëve narkotike përmes monitorimit të territorit me dron.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër për veprime të mëtejshme.
