Një grua 32-vjeçare nga Irlanda, e cilësuar nga mediat si “njerka e keqe”, është dënuar me burgim të përjetshëm për vrasjen e djalit katërvjeçar të partnerit të saj, Mason O’Connell Conway.
Vendimi u mor pas një gjyqi tronditës, i cili zbuloi se fëmija kishte qenë viktimë e keqtrajtimit për disa javë.
Sipas gjykatës, Mason ishte izoluar dhe ishte përballur me dhunë të vazhdueshme, ndërsa pasojat e abuzimit rezultuan fatale.
Gjyqtari Paul McDermott e shpalli McGhee fajtore për vrasje dhe për dy akuza shtesë të mizorisë ndaj fëmijëve, duke vendosur edhe katër vjet e gjashtë muaj dënim shtesë, që do të vuhet paralelisht me burgimin e përjetshëm.
Babai i Masonit, 36-vjeçari John Paul O’Connell, ishte dënuar më herët me shtatë vjet burg për rrezikim të fëmijës dhe pengim të drejtësisë, pasi dyshohet se kishte dijeni për krimin ose përfshirjen e partneres së tij.
Një nga momentet më prekëse të procesit gjyqësor ishte dëshmia e nënës së Masonit, Elizabeth Conway. Ajo foli për dhimbjen e thellë dhe vitet e ankthit që përjetoi, duke e përshkruar të birin si një fëmijë të dashur, të zgjuar dhe plot energji, që solli gëzim në jetën e familjes.
Rasti ka shkaktuar reagime të forta në opinionin publik në Irlandë, duke rikthyer në vëmendje nevojën për masa më të forta për mbrojtjen e fëmijëve dhe për parandalimin e abuzimeve.
Vendimi i gjykatës shihet si një mesazh i qartë se dhuna ndaj fëmijëve do të ndëshkohet me ashpërsinë maksimale të ligjit.
