Mbretëria e Bashkuar ka nisur tërheqjen e një pjese të personelit ushtarak nga baza ajrore Al Udeid në Katar, e cila drejtohet nga Shtetet e Bashkuara, raportoi Sky News.
Lëvizja vjen pas deklaratave të presidentit amerikan Donald Trump, i cili u bëri thirrje protestuesve në Iran të vazhdojnë presionin ndaj regjimit dhe paralajmëroi “veprime shumë të forta” nëse Teherani vijon me ekzekutimet e planifikuara.
Nga ana e saj, Irani ka kërcënuar se do të hakmerret ndaj objektivave ushtarake amerikane në rajon në rast të një sulmi të mundshëm, duke shtuar tensionet në Gjirin Persik.
Edhe SHBA-të kanë filluar tërheqjen e një pjese të stafit nga baza Al Udeid, e konsideruar si pika kryesore e pranisë ushtarake amerikane në Lindjen e Mesme.
Një zëdhënës i Ministrisë britanike të Mbrojtjes tha se vendimi lidhet me masa sigurie dhe nuk dha detaje për numrin e ushtarakëve të përfshirë, duke theksuar se “Mbretëria e Bashkuar gjithmonë vendos masa paraprake për të mbrojtur personelin e saj, përfshirë tërheqjen kur është e nevojshme”.
Nuk është ende e qartë nëse tërheqja britanike do të jetë e pjesshme apo e plotë.
