Lideri suprem i Iranit, Ali Khamenei, u vra në një sulm ajror të papritur në mëngjesin e së shtunës në Teheran, në një operacion të koduar “Operation Genesis”, që shënoi fillimin e luftës së SHBA-ve dhe Izraelit kundër Iranit.
Sipas një rindërtimi të detajuar nga The Wall Street Journal, sulmi u krye nga avionë luftarakë izraelitë McDonnell Douglas F-15, të cilët u ngritën rreth orës 07:30 sipas orës së Iranit për të goditur objektivin më të studiuar të inteligjencës izraelite.
Dekada përgjimi dhe spiunazhi
Për më shumë se dy dekada, njësia elitare e Inteligjencës izraelite “Unit 8200” monitoroi komunikimet dhe rutinën e Khameneit dhe të udhëheqjes iraniane.
Analistët përdorën përgjime telefonike, operacione kibernetike dhe Inteligjencë Artificiale për të analizuar një volum të madh të dhënash.
Sipas burimeve, Izraeli rekrutoi gjithashtu spiunë në Iran dhe hakeroi kamerat e trafikut në Tehran për të marrë informacion në kohë reale mbi lëvizjet e zyrtarëve.
Edhe Agjencia Qendrore e Inteligjencës amerikane (CIA) ndau informacione me Izraelin gjatë përgatitjes së operacionit.
Goditja e papritur
Në orën 09:40, dhjetëra raketa të lëshuara nga avionët F-15 goditën kompleksin e udhëheqjes iraniane.
Mes tyre ishte edhe sistemi raketor Blue Sparrow, i cili ngjitet jashtë atmosferës përpara se të zbresë me shpejtësi drejt objektivit.
Raketat goditën disa takime të nivelit të lartë brenda kompleksit të liderit në Teheran. Pak minuta më vonë, banorët e qytetit panë tym të madh që ngrihej nga zona e rezidencës së udhëheqësit.
Pasojat e sulmit
Sipas analizës së imazheve satelitore, të paktën gjashtë ndërtesa në kompleksin e liderit u dëmtuan rëndë, përfshirë rezidencën ku ndodhej Khamenei në momentin e sulmit.
Sulmet vranë gjithashtu disa figura të larta të regjimit, përfshirë:
-këshilltarin e Khameneit, Ali Shamkhani;
-ministrin e Mbrojtjes Aziz Nasirzadeh;
-komandantin e Gardës Revolucionare Islamike të Iranit, Mohammad Pakpour.
Pas vrasjes së Khameneit, SHBA-të dhe Izraeli zgjeruan menjëherë operacionet ushtarake.
Marina amerikane lëshoi raketa Tomahawk, ndërsa sistemet M142 HIMARS goditën objektiva në Iranin jugor.
Brenda 24 orëve të para, u goditën më shumë se 1,000 objektiva ushtarake në Iran.
Pas sulmit, një këshill i përkohshëm prej tre personash mori drejtimin e vendit, ku përfshihet presidenti i Iranit Masoud Pezeshkian.
Ndërkohë, në qytete të ndryshme si Isfahan dhe Karaj u raportuan protesta dhe tubime, ku disa qytetarë festuan vrasjen e liderit, ndërsa të tjerë dolën në rrugë për ta vajtuar.
