Grupi Parlamentar i Partisë Socialiste hapi sot vitin e ri kuvendor, në një mbledhje ku mbajti fjalën Kryeministri i Republikës së Shqipërisë njëherësh Kryetari i Partisë Socialiste, Edi Rama.
Në nisje të fjalës, shefi i qeverisë e vuri theksin te negociatat për anëtarësim në BE dhe theksoi se brenda dy vitesh Shqipëria duhet të përmbushë kriteret për integrim në BE.
Ai tha se edhe brenda vetë Partisë Socialiste dhe Grupit Parlamentar, por edhe më gjerë në opinionin publik, mungon një kuptim i plotë mbi peshën reale të sfidave dhe detyrimeve që sjell procesi i negociatave. Ai nënvizoi se integrimi nuk është thjesht përmbushje kushtesh formale, por përballje me një realitet krejtësisht të ri, ku Shqipëria do të jetë pjesë e një tregu prej 450 milionë banorësh, duke sjellë sfida të shumëfishta si për sektorin prodhues, ashtu edhe për institucionet.
Rama: Për 2 vite, Shqipëria të përmbushë të gjitha kushtet për të mbyllur negociatat e anëtarësimit sikundër e kemi të qartë nga plani që kemi në tryezë i dakordësuar me BE, dhe sikundër e kemi bërë të qartë edhe për opinionin publik. Akoma sot edhe brenda nesh, brenda grupit parlamentar dhe lërë më pastaj brenda partisë dhe lërë në opinionin publik, nuk ka një kuptim të qartë për çfarë do të thotë në pikëpamje të sfidës dhe të barrës së detyrimeve përmbushja e kushteve për të dalë me sukses nga procesi i negociatave dhe pastaj përmbushja e kushteve për të përballuar përfshirjen në një realitet tërësisht të ri, siç është realiteti i një tregu prej 450 milionë njerëzish, ku Shqipëria e integruar të jetë një pikë uji në oqean. Sfida për të gjithë sektorin prodhues dhe po ashtu për institucionet do të jetë e shumëfishtë.
Kryeministri theksoi se beteja kryesore në procesin e integrimit europian do të jetë sektori i prodhimit ushqimor. Ai tha se Shqipëria aktualisht është e paintegrueshme në Bashkimin Europian për shkak të nivelit të pamjaftueshëm të sigurisë ushqimore sipas standardeve të BE-së, ndaj po kërkohet një periudhë tranzitore pesëvjeçare pas anëtarësimit. Rama nënvizoi se përgatitjet duhet të nisin menjëherë, pasi koha kalon shpejt, duke shtuar se megjithëse është bërë përparim i ndjeshëm që nga viti 2013, vendi mbetet ende larg kritereve europiane, çka rrezikon bllokimin e produkteve ushqimore si në tregun e BE-së, ashtu edhe në atë vendas.
Rama: Beteja kryesore është për sektorin e prodhimit ushqimor, për të gjithë prodhuesit në fshat, për të gjithë sipërmarrjen që përpunon prrodhimet ushqimore. Në kushtet e sotme jemi të paintegrueshëm në BE për shkak të nivelit të pamjaftueshëm të sigurisë ushqimore sipas kritereve të BE. Për këtë arsye po përpiqemi të fitojmë një fazë të ndërmjetjme prej 5 vjetësh pas anëtarësimit. Përgatitjet duhet të fillojnë tani, pasi vitet kalojnë shpejt. Duke u kthyer pas në vitin 2013, duhet të kaloni në filmin e kujtesës gjënë e gjallë që therrej në rrugë. Që nga ajo kohë është bërë shumë përparim, por në raport me kriteret e sigurisë së ushqimit në BE jemi ende larg. Kjo do të thotë që në momentin e anëtarësimit dhe pastaj në momentin kur përfundon periudha e ndërmjetme asnjë ushqim i prodhuar në Shqipëri nuk mund të shitet veçse në Shqipëri. Edhe në Shqipëri do të funksionojnë kriteret e njëjta. Kjo do të thotë që ushqimet mund të bllokohen sepse nuk përmbushin kriteret e sigurisë.
Rama tha se duhet punë dhe vendosmëri për të mos falur asgjë dhe askënd për të arritur rezultatet e dëshiruara.
