FIFA ka publikuar mbrëmjen e së shtunës oraret dhe stadiumet zyrtare për Botërorin e vitit 2026. Ashtu siç pritej, ato nuk janë aspak të favorshme për Europën, pasi janë vendosur në bazë të orës zyrtare të Amerikës Lindore, që është 6 orë diferencë me vendin tonë.
Fillimisht Kombëtarja shqiptare duhet të shkojë në Botëror, pastaj të bëjë llogaritë dhe të analizojë kundërshtarët. Por formula e FIFA-s na kushtëzon, që për momentin të flasim në mënyrë hipotetike.
Shqipëria duhet të sigurojë biletën për eventin madhor të vitit 2026 nga “Play Off”-I, ku do të përballet me Poloninë në gjysmëfinale më 26 mars në Varshavë dhe më pas me fituesin e çiftit Suedi-Ukrainë.
Në rast se kuqezinjtë ia dalin, atëherë do të duhet të vendosen në grupin F të Botërorit me Holandën, Japoninë dhe Tunizinë. Pikërisht me këta të fundit do të ishte ndeshja e parë në grup, që me orën europiane i bie më 15 qershor në orën 4 të mëngjesit. Kuqezinjtë do të debutojnë në stadiumin “BBVA” në Monterrei të Meksikës, që është një nga stadiumet më madhështorë të Botërorit.
Sfida e dytë kundër Holandës do të luhet në NRG Stadium në Hjuston më 20 qershor në orën 13 në SHBA, që korresponson me orën 19:00 në Shqipëri.
Dueli i fundit në grup do të jetë më 26 qershor në orën 01:00 kundër Japonisë, që do të luhet në ATT Stadium në Dallas.
Kujtojmë se nga çdo grup kualifikohen për në fazën e ardhshme të Botërorit 2 skuadrat e para dhe 8 të tretat më të mira. Eventi do të nisë me sfidën Meksikë-Afrikë e Jugut më 11 qershor.
