Administrata e presidentit Donald Trump u ka komunikuar vendeve që kërkojnë një vend të përhershëm në Bordin e ri të Paqes për Gazën (Gaza Board of Peace – BoP) se duhet të kontribuojnë të paktën 1 miliard dollarë, raporton Bloomberg News.
Sipas raportit, Bordi i Paqes do të jetë përgjegjës për rindërtimin e Rripit të Gazës dhe për garantimin e çarmatimit të Hamasit. Një draft-kartë e bordit, e parë nga Bloomberg, parashikon që çdo shtet anëtar të ketë një mandat jo më të gjatë se tre vjet, me mundësi rinovimi nga kryetari i bordit.
Megjithatë, ky kufizim nuk do të zbatohet për vendet që kontribuojnë më shumë se 1 miliard dollarë në fonde cash brenda vitit të parë nga hyrja në fuqi e kartës, duke u siguruar atyre status të përhershëm në bord.
Dokumenti e përshkruan Bordin e Paqes si “një organizatë ndërkombëtare që synon të promovojë stabilitetin, të rivendosë qeverisjen e besueshme dhe ligjore, si dhe të sigurojë paqe të qëndrueshme në zonat e prekura ose të kërcënuara nga konfliktet”. Bordi do të bëhet zyrtar pasi të paktën tre shtete të pranojnë kartën e propozuar. Shtëpia e Bardhë nuk ka komentuar menjëherë mbi raportimin e Bloomberg.
