Përkeqësimi i menjëhershëm i motit dhe reshjet e shumta të borës gjatë 24 orëve të fundit kanë sjellë problematika të shumta kryesisht në veri dhe verilindje të vendit.
Disa fshatra në malësinë e Krujës janë bllokuar plotësisht, ndërsa reshjet e borës që shkojnë deri në 50 centimetra, kanë shkaktuar dhe ndërprerjen e energjisë elektrike.
Situatë e vështirë paraqitet edhe në Laç, ku raportohet për bllokim të aksit rrugor që lidh qytetin e Laçit me kishën e Sh’na Ndoit.
Dhjetra fshatra janë izoluar në Kukës, për shkak të bllokimit të rrugëve nga bora. Aksi rrugor Librazhd-Peshkopi është i pakalueshëm.
Policia bën apel që drejtuesit e mjeteve të cilët udhëtojnë nga Skurajt në drejtim të Ulzës, ta shmangin këtë segment rrugor pasi është bllokuar rruga në Qafë të Ulzës.
Vështirësi qarkullimi ka në aksin rrugor Prrenjas –Qafë Thanë.
Trashësi mbi 40 cm dëborë janë regjistruar në zona si Mirdita, Bulqiza, Kukësi, Dibra, Librazhdi, Korça apo në çdo lartësi mbi 300 metra nga niveli i detit. Në qarkun e Dibrës rruga e “Arbrit” është e pakalueshme. Emergjencat civile raportuan si të bllokuara edhe disa zona rurale, sidomos në qarkun Dibër.
Gjatë natës zonat malore të Mirditës janë përfshirë nga reshje të dendura dëbore të cilat kanë vijuar me intensitet të lartë shoqëruar dhe me stuhi në zonat mbi 300 metra mbi nivelin e detit. Në njësitë Fan, Orosh dhe Selitë, trashësia e dëborës ka arritur në disa centimetra, duke bllokuar rrugët e fshatrave. Po ashtu, raportohet të ketë ndërprerje të energjisë elektrike, ndërsa lëvizja në Rrugën e Kombit nga Repsi në Thirrë po mbahet në monitorim, pasi ka prani të ngricave në rrugë.
