PSG po shqyrton një goditje të madhe në merkato, duke synuar një nga yjet kryesorë të Chelseat. Sipas Mundo Deportivo, objektivi kryesor i parizienëve është mesfushori argjentinas Enzo Fernández, për të cilin po përgatitet një ofertë që kalon 100 milionë euro.
Raportohet se PSG kërkon të përfitojë nga situata e paqëndrueshme te Chelsea pas shkarkimit të Enzo Maresca-s, ndërsa thuhet se Fernández është zhgënjyer nga largimi i trajnerit, me të cilin kishte ndërtuar një marrëdhënie të fortë pune.
Chelsea nuk dëshiron të ndahet lehtë nga një prej lojtarëve më të rëndësishëm, por rolin vendimtar mund ta ketë vetë dëshira e lojtarit. PSG e di se për të hapur negociata serioze, oferta duhet të jetë mbi pragun e 100 milionë eurove.
Enzo Fernández u transferua te Chelsea në vitin 2023 për rreth 123 milionë euro, shifra rekord për klubin londinez. Këtë sezon ai ka luajtur 30 ndeshje në të gjitha kompeticionet, duke shënuar 8 gola dhe dhënë 3 asistime. Ndërkohë, “Transfermarkt” e vlerëson aktualisht me 85 milionë euro.
