Nga fillimi i vitit 2026, rreth 2,400 biznese që furnizohen me energji në nivelin 6 kilovolt do të kalojnë nga sistemi i rregulluar në tregun e lirë të energjisë.
Kjo nënkupton se ato do të kenë mundësinë ta blejnë vetë energjinë elektrike duke zgjedhur ndërmjet furnizuesve privatë ose tregut të bursës së energjisë.
Kjo nismë është pjesë e planit të qeverisë për liberalizimin gradual të tregut energjetik shqiptar dhe synon të rrisë konkurrencën dhe transparencën në formimin e çmimeve.
Albi Gjenerali, administrator i Autoritetit të Furnizuesit të Tregut të Lirë, theksoi se me kalimin e bizneseve të nivelit 6 kV, rreth 80% e konsumit të sektorit jo-familjar do të operojë në treg të lirë.
Ai po ashtu siguroi se procesi do të ndihmojë zhvillimin e tregut lokal, ndërsa konsumatorët familjarë do të vazhdojnë të mbeten nën sistemin e mbrojtur për momentin.
FTL ka njoftuar se kalimi në tregun e lirë do të ketë një monitorim të vazhdueshëm për të garantuar që asnjë subjekt të mos mbetet pa energji gjatë fazës së tranzicionit.
Gjenerali shtoi se do të ofrojnë asistencë për bizneset në regjistrimin dhe lidhjen e kontratave me furnizuesit e rinj, për ta bërë kalimin më të lehtë dhe pa ndërprerje në furnizimin me energji.
Ky hap është i rëndësishëm për Shqipërinë, pasi po e afron vendin me modelin evropian të tregut të energjisë, ku çmimi përcaktohet nga konkurrenca dhe jo nga rregullimi shtetëror.
Liberalizimi i tregut energjetik pritet të sjellë përfitime të shumta, duke përfshirë rritjen e efikasitetit ekonomik dhe të stimulojë investimet e huaja në sektorin energjitik. Me këtë strategji, qeveria ka për qëllim të modernizojë sektorin dhe të ofrojë mundësi më të mira për bizneset dhe konsumatorët shqiptarë.
