Betis ka fituar 2-1 ndaj Real Madrid në “Benito Villamarin” në sfidën e vefshme për javën e 26-të në La Liga. Ishin madrilenët ata që kaluan të parët në avantazh. Pas një aksioni të bukur, Kylian Mbappe pason për Ferland Mendy, ky i fundit asiston për Brahim Diaz, i cili nuk mund të gabonte nga aq afër duke kaluar Realin në avantazh në minutën e 10-të.
Vendasit barazuan shifrat me Cardoso në minutën e 33-të, i cili shënoi pas krosimit që mori nga goditja e këndit nga Isco. Pjesa e parë mbyllet në barazim 1-1.
Në minutën e 52-të, pas asistit të Isco, Rodriguez pengohet brenda zone nga Rudiger, arbitri akordon penallti dhe ndëshkon me karton të verdhë mbrojtësin gjerman. Isco tregohet i saktë nga pika e bardhë e penalltisë dhe kalon Betis në avantazh. Edhe pse ka veshur fanellën e Real-it për disa sezone, Isco festoi si i “çmendur” golin ndaj ish-ekipit të tij. Duhet thënë se Isco bëri një super ndeshje sot, dhe jo më kot u zgjodh si lojtari më i mirë i takimit.
Rezultati mbeti i pandryshuar deri në fund, Betis merr kështu një fitore të madhe dhe iu bën një nder të madh Barcelonës dhe Atletico Madrid. Pas kësaj fitoreje, Betis renditet në vendin e gjashtë me 38 pikë, Reali mbetet në vend të dytë me 54 pikë, por tashmë do i ketë sytë nga sfidat e dy rivalëve. Atletico Madrid luan pas pak ndaj Athletic Bilbao, ndërsa Barcelona pret nesër Sociedad.
