Liri Berisha, bashkëshortja e liderit të Partisë Demokratike erdhi si rrallë herë në një intervistë ndryshe. Për “Lolitën”, zonja Berisha u rrëfye për të thënat dhe të pathënat. Një ndër pyetjet të cilat iu drejtua asaj kishte të bënte me politikën, nëse ajo do të kishte zgjedhur atë rrugë dhe do të ishte një politikane më e zonja se bashkëshorti i saj, Sali Berisha.
Kësaj pyetje Liri Berisha iu përgjigj duke thënë se asnjëherë nuk e ka menduar veten pjesë e politikës dhe të ketë një tjetër profesion. Pasi ashtu sikurse dhe ajo e tha nuk do të kishte dhënë të njëjtën kontribut që ka dhënë në Pediatri, profesion të cilit i ka dhënë shpirtin, kohën dhe dëshirat.
“Jo kurrë nuk e kam menduar që mund të punoj aty, që të jem politikane apo të kem një tjetër profesion. Jam e bindur që nuk do kisha dhënë kurrë një kontribut kaq me pasion saç e jap në pediatri, po të kisha qenë në politikë. Pastaj zgjedhja e profesionit vjen përbrenda. Unë e kam bërë me shumë pasion profesionin tim ka qenë një profesion që kam dhënë shpirtin, kohën , jetën, dëshirat dhe çdo gjë ka qenë e lidhur me profesionin”, u përgjigj Liri Berisha.
Këtë copëz të intervistës e ka rishpërndarë së fundmi vetë Berisha, i cili ndryshe nga bashkëshortja e tij, ka shprehur të gjithë suportin duke thënë se nëse do të ishte pjesë e politikës, do të shkëlqente.
“Unë mendoj se do ishe e shkëlqyer”, shkruan Berisha.
