Ish-kryeministri Sali Berisha u paraqit në SPAK ditën e sotme në zbatim të masës së sigurisë “Detyrim Paraqitje”, lidhur me dosjen “Partizani”. Berisha qëndroi vetëm pak minuta në ambientet e Prokurorisë dhe pasi doli foli për gazetarët.
Ai sulmoi gjyqtaren Irena Gjoka dhe kreun e SPAK, Altin Dumani. Berisha e quajti gjyqtaren Irena Gjoka mashtruese, ndërsa akuzoi Dumanin se po e mbron gjyqtaren me të gjitha mënyrat.
Berisha: Irena me tre apo 5 mbiemra është një delikuente e cila ka vendin jo në drejtësi por atje ku e meriton. Por, Altin Troplini me urdhër të Edi Ramës bën çdo gjë t’i zgjasë kësaj qënie delukiente qëndrimin në sistem duke u bërë bashkë me Altinin fytyra e vërtetë e reformës.
Irena me tre mbiemra është një mashtruese oridinere pasi ajo është shkarkuar 1996 për korrupsion nga Këshilli i Lartë i Drejtësisë dhe këtë ja u ka mohuar avokatëve të mi. Irena me tre mbiemra që mbrohet me të gjitha mënyra nga Altin Troplini është një delikuente e cila ka mashtruar në formularin e dekriminalizimit për të cilin ajo meriton largimin nga drejtësia dhe ndjekjen penale.
Ditën e sotme mbahet në Gjykatën e Posaçme seanca e radhës për çështjen “Partizani”. Seanca paraardhëse u shty për shkak se kreu i PD Sali Berisha nuk ishte i pranishëm.
Ai pretendoi se nuk kishte marrë një njoftim zyrtar në lidhje me seancën, megjithatë në komunikime të mëparshme me gazetarët, Berisha ka deklaruar se do të jetë i pranishëm në seancën e sotme. Kujtojmë se Sali Berisha akuzohet për “korrupsion pasiv të funksionarëve të lartë” e kryer në bashkëpunim, ndërsa dhëndri i tij Jamarbër Malltezi akuzohet për “korrupsion pasiv” dhe “pastrim parash”, kryer në bashkëpunim.
