Partia Demokratike ka njoftuar një tjetër protestë para SPAK-ut, në momentin kur lideri i saj, Sali Berisha, pritet të paraqitet sërish në Prokurorinë e Posaçme.
Sipas një mesazhi të shpërndarë brenda strukturave të PD-së, demokratët janë ftuar të mblidhen para SPAK-ut në orën 09:30 për të kundërshtuar atë që e cilësojnë një proces të motivuar politikisht.
“Te dashur miq. Diten e Hene eshte data e radhes e percaktuar per tu parqitur Kryetari i PD Prof Dr Sali Berisha ne SKAP. ..
Ndaj ne ora 9:30 perseri te gjithe ne proteste perpara SKAP- it si vegel ne duart e Rames per te perndjekur kundershtaret politik. Faleminderit”, thuhet në mesazhin e shpërndarë me strukturat e PD.
Ndërkohë, SPAK ka apeluar vendimin për lirimin e ish-kryeministrit nga arresti shtëpiak, duke kërkuar rikthimin e kësaj mase sigurie. Berisha është liruar më 27 nëntor 2024, pas gati një viti në arrest shtëpiak, si pjesë e hetimeve në çështjen “Partizani”.
Ish-kryeministri akuzohet për korrupsion pasiv, pasi dyshohet se ka ndikuar në miratimin e ligjeve dhe akteve nënligjore që favorizonin pronarët e kompleksit sportiv “Partizani”. Sipas SPAK, nga këto veprime ka përfituar edhe Jamarbër Malltezi, dhëndri i Berishës.
