Sali Berisha do të paraqitet nesër për të respektuar masën e sigurisë “detyrim paraqitje” të vendosur ndaj tij nga GJKKO, në kuadër të hetimeve për dosjen “Partizani”. Ai do të shkojë në dyert e Prokurorisë së Posaçme, dhe bashkë me të, duket se do të jenë të pranishëm edhe mbështetës të tjerë të tij.
Për këtë ngjarje, vetë kryedemokrati ka bërë thirrje për mobilizim të strukturave të Partisë Demokratike, duke kërkuar që ata të jenë në orën 9:30 para SPAK-ut. Në mesazhin dërguar strukturave të PD, thuhet: “Të dashur miq, nesër në ora 9:30 Kryetari i PD, Prof. Dr. Sali Berisha do të jetë në dyert e SPAK-ut! Ju lutem mobilizoni strukturat e degëve për të qenë të gjithë aty. Faleminderit!”
Kjo thirrje vjen vetëm dy ditë pasi Berisha paralajmëroi kryeministrin Edi Rama se nëse do të organizohen protesta pro Erion Veliajt para dyerve të GJKKO apo SPAK, opozita do të kundërpërgjigjej me një protestë në mbrojtje të organeve të drejtësisë.
