Gjykata e Tiranës ka konfirmuar këtë të martë masën “arrest me burg” për Flodian Plakun, i njohur edhe me mbiemrin Mamo dhe Serjani.
Togat e zeza vendosën që të lënë në qeli 42-vjeçarin i cili u prangos disa ditë më parë nga Operacionalia në Orikum, pasi akuzohet për vrasjen e ish-policit Gentjan Bejtja.
Burime për mediat bëjnë me dije se para gjyqtarëve ai ka mohuar akuzat e ngritura ndaj tij duke theksuar se nuk ka asnjë lidhje me vrasjen e ish-efektivit.
“Nuk kam lidhje me ngjarjen, kam përdorur një Golf para 10 ditësh, prandaj erdhi policia tek unë”,mësohet të ketë thënë ai.
Policia e Vlorës, në bashkëpunim me Forcat e Posaçme Operacionale dhe RENEA-n, prangosën dy ditë më parë Flodian Plakun, i njohur edhe me emrat Florian Serjani dhe Florian Mamo. Arrestim i tij u bë i mundur në ambientet e hotelit “Doko” në Radhimë, aty ku dhe ai prej javësh po qëndronte me mikun e tij, Julian Aliajn.
Një skuadër operacionale e Policisë Shtetit, e drejtuar nga prokurori i Tiranës, Ridvan Suka, arritën të lokalizojnë Plakun, i cili është i dyshuar për vrasjen e Gentjan Bejtjas në zonën e Orikumit.
Prej katër muajsh Operacionalja ishte përqendruar në këtë zonë, por nuk mundën që të binin në gjurmët e tij. Falë ndihmës së një berberi nga Vlora, i cili ishte porositur nga miqtë e Plakur për të shkuar në hotelin ku dhe ai po qëndronte, policia mundi që të lokalizonte vendin ku ai po strehohej. Berberi u ndoq nga agjentët e operacionaleve, të cilët e panë duke hyrë në ambientet e hotelit për të qethur Flodian Plakut.
Pas verifikimit të vendndodhjes, RENEA bënë të mundur ndërhyrjen dhe arrestuan Plakun, pa bërë asnjë reagim. Gjatë kontrollit në dhomën e tij, u gjetën dy pistoleta, ndërsa bashkë me Plakun u arrestua edhe miku i tij, Julian Aliaj për akuzën “Mbajtje pa leje të armëve të zjarrit”.
Aliaj është proceduar gjithashtu për “Përkrahje të autorit të krimit” dhe “Mbajtje pa leje të armëve të zjarrit” dhe do të ndiqet nga prokuroria e Vlorës.
Flodian Plaku akuzohet si një nga personat që ka ekzekutuar ish-policin e burgjeve, Gentjan Bejtja, mik të Ervis Martinaj. Më parë për këtë ngjarje është arrestuar Edison Haxhiaj për akuzën “Sigurimi i kushteve për të kryer vrasje”.
Ndërsa, Ilirjan Brahimi miku i Plakut është në proces gjykimi për përfshirje në këtë krim, i cili është kunati i Roan Brahimi.
