Gjykata e Beratit ka shpallur fajtorë Aleksandër Shullën, ish-drejtor i Shërbimit Informativ të Shtetit (SHISH), dhe djalin e tij, Pandeli Shulla, për disa vepra penale, përfshirë organizimin e lojërave të fatit të paligjshme, mbajtjen e armëve pa leje dhe nxjerrjen e sekretit hetimor.
Sipas vendimit, Pandeli Shulla është dënuar me një vit e katër muaj burgim, dënim që është ulur me një të tretën. Gjykata ka vendosur pezullimin e ekzekutimit të këtij dënimi, duke e vënë atë në provë për një periudhë prej dy vitesh e tetë muajsh, me kusht që të mos kryejë vepra të tjera penale.
Nga ana tjetër, Aleksandër Shulla është dënuar me një vit e katër muaj burgim për veprën penale të mbajtjes së armëve pa leje, si dhe me dy vite burgim për nxjerrjen e sekretit shtetëror. Gjykata ka vendosur gjithashtu përjashtimin e tij nga ushtrimi i funksioneve publike për një periudhë prej pesë vitesh.
Hetimet zbuluan se në një lokal të administruar nga Pandeli Shulla zhvilloheshin lojëra fati të paligjshme, përmes kompjuterëve të pajisur me programe të posaçme që ofronin lojëra online, të ngjashme me ato të kazinove. Ndërkohë, gjatë një kontrolli në banesën e Aleksandër Shullës u gjet një krëhër metalik me fishekë të kalibrit 7.62 mm.
Aleksandër Shulla ka deklaruar se fishekët i kishte mbajtur si suvenir nga një godinë e vjetër e ShIK-ut, por prokuroria konstatoi se armët ishin dorëzuar më herët dhe se dy materiale të sekuestruara në pajisje USB rezultuan të klasifikuara si sekrete shtetërore, duke përbërë shkelje të rënda të rregullave për mbrojtjen e informacionit të klasifikuar.
Pas një hetimi të thelluar, organi i akuzës konkludoi se ekzistojnë prova të mjaftueshme për fajësinë e të dy të pandehurve, ndërsa gjykata vendosi edhe masa shtesë, përfshirë pezullimin e të drejtave për të ushtruar funksione publike.
