Biznesmeni dhe politikani kosovar Behgjet Pacolli ka dalë me akuza të forta ndaj qeverisë shqiptare dhe ministres së Infrastrukturës, Belinda Balluku, duke pretenduar se gara për ndërtimin e Aeroportit të Vlorës ishte e manipuluar dhe fituesi ishte vendosur paraprakisht.
Pacolli, në një intervistë ku foli për konfliktin me Valon Ademin dhe marrëdhëniet me qeverinë shqiptare, tha se projekti ishte pjesë e një marrëveshjeje të mëparshme me palë turke, të udhëzuara sipas tij nga “Presidenca turke”.
“Ai (Valon Ademi) më propozoi të hynim në një koncesion që kishte dështuar më herët. Pasi kompania ime e studioi projektin, rezultoi me interes. U përfshi edhe Aeroporti i Mynihut si kompani menaxhuese. Por papritur, mora një telefonatë nga një person në Turqi që më tha se ishte dërguar nga Presidenca turke për të ndërtuar spitalin dhe një aeroport në Shqipëri,” – deklaroi Pacolli.
Ai tregon se ka marrë pjesë në një takim në Ministrinë e Infrastrukturës, ku ka vërejtur se “ministrja i propozoi turkut të ishte bashkëfinancues”, duke u ndjerë i lënë mënjanë.
“Kuptova që gjithçka ishte e paracaktuar. Turku më tha më vonë se do të kishte 60% të projektit, unë 40%. Më pas ndryshuam marrëveshjen në 58% për mua, 40% për ta dhe 2% për Valon Ademin,” – shtoi ai.
Pacolli indirekt ngriti akuza të forta ku sipas tij, e gjithë procedura ka qenë një farsë, pasi “gara nuk ka ekzistuar realisht”. Ai pretendon se kompanitë turke u futën vetëm për të plotësuar kushtet teknike dhe më pas u tërhoqën, duke e lënë projektin në kaos.
Ky rrëfim ngre pikëpyetje të reja mbi mënyrën se si është zhvilluar procesi i koncesionit për Aeroportin e Vlorës dhe kërkon hetim të plotë të çështjes.
