Shiko videon KËTU!
Presidenti i Republikës së Shqipërisë, Bajram Begaj, zhvilloi sot homazhe pranë trupit të Papa Françeskut në Bazilikën e Shën Pjetrit në Vatikan, ku u organizua një ceremoni solemne për të nderuar Atin e Shenjtë.
Në këtë ngjarje të rëndësishme morën pjesë krerë shtetesh, përfaqësues të lartë të kishës dhe besimtarë nga mbarë bota.
Presidenti Begaj ishte i shoqëruar nga Presidentja e Republikës së Kosovës, Vjosa Osmani, si dhe nga përfaqësues të shquar të komuniteteve fetare në Shqipëri, përfshirë kardinalin Ernest Simoni, Fortlumturinë e Tij Joan Pelushi, Kreun e Kishës Ortodokse Autoqefale të Shqipërisë, Imzot Arjan Dodaj, Arqipeshkvin e Tiranë-Durrësit, H. Bujar Spahiu, Kryetarin e Komunitetit Mysliman të Shqipërisë, Haxhi Dede Baba Edmond Brahimaj, Kryegjyshin Botëror të Bektashinjve, si edhe Gent Kruja, Kreun e Këshillit Ndërfetar të Shqipërisë.
Kjo përfaqësi e gjerë krerësh të besimeve të ndryshme, shpalosi edhe njëherë frymën e harmonisë dhe bashkëjetesës fetare që identifikon Shqipërinë.
Kjo atmosferë bashkëpunimi dhe tolerance ndërfetare është vlerësuar në mënyrë të veçantë edhe nga vetë Papa Françesku gjatë vizitës së tij historike në vendin tonë.
