Bashkimi Europian ka shprehur pritshmëri të larta ndaj qeverisë për implementimin e strategjisë antikorrupsion, veçanërisht në sektorët e Kadastër, Administratës Tatimore, Doganave dhe Prokurimeve Publike.
Ambasadori i Bashkimit Europian në Tiranë, Silvio Gonzato, gjatë fjalës së tij në forumin rajonal mbi mirëqeverisjen dhe luftën kundër korrupsionit, theksoi rëndësinë e veprimeve konkrete për të adresuar fenomenin e korrupsionit në vend.
Ai shprehu mbështetje për komisionin “Xhafaj” dhe kërkoi që masat e ndërmarra të shfaqen me rezultate të prekshme, duke i dhënë prioritet transparencës dhe përgjegjshmërisë.
“Kuvendi krijoi një Komision të Posaçëm me synimin e avancimit të reformave të mirëqeverisje, antikorrupsionin dhe sundimin e ligjit. Kjo është një mundësi për të fuqizuar përpjekjet për parandalimin e korrupsionit, duke përfshirë kështu një sërë aktorësh dhe ekspertësh. Në fakt një përpjekje në të gjithë vendin dhe sigurisht që duke patur parasysh rezultatet që janë arritur duhet të vijojmë më tej. Në Shqipëri ne presim që puna e qeverisë për strategjinë antikorrupsion 2024-2030 të përfundohet të shpejti dhe të miratohet. Pas miratimit ne presim zbatimin e plotë të kësaj strategjie, në ve?anti në sektorë me rrezik të lartë si Kadastra, Administrata Tatimore, Dogana, Prokurimi Publik, arsimi dhe shëndetësia”, tha Gonzato.
