Bayern Munich ka marrë një vendim të papritur në fushën e sigurisë digjitale dhe automatizimit të brendshëm: klubi u ka ndaluar punonjësve përdorimin e ChatGPT dhe platformave të tjera të jashtme me inteligjencë artificiale. Në vend të tyre, stafi duhet të përdorë një sistem AI të zhvilluar brenda klubit.
Lajmi u bë i ditur nga Thomas Ehemann, drejtues i Digital Fan Experience, i cili në panairin sportiv ISPO në Mynih tha se platforma e brendshme tashmë po përdoret aktivisht në departamentin e shërbimit ndaj tifozëve dhe në atë ligjor. Për të mos lejuar shmangien e kësaj zgjidhjeje, Bayern ka bllokuar aksesin në shërbimet e jashtme AI në pajisjet e punës, përfshirë edhe ChatGPT.
Sipas Ehemann, pothuajse nuk ka pasur rezistencë nga stafi: “Menduam se do të kishte më shumë kundërshtime, por punonjësit janë të kënaqur me mjetin fleksibël dhe të lehtë për t’u përdorur.”
Si rezultat, rreth 300 punonjës të Bayern Munich nuk kanë më akses në ChatGPT.
