Basketbolli shqiptar dhe veçanërisht ai dinamovit është zgjuar këtë të hënë në zi. Në moshën 55-vjeçare, në mënyrë të papritur, është ndarë nga jeta Enea Andrea, ish-lojtar i njohur i Dinamos dhe vëllai i aktores së njohur Ema Andrea, pas një ataku në zemër, mëson ekskluzivisht Iliria News.
Andrea ka qenë pjesë e brezit të artë të Dinamos deri rreth viteve 2005. Së bashku me emra të njohur si Eduard Carcani, Dritan Mema, Skerdi Muça, Alfred Rushaj, Afrim Bilali dhe nën drejtimin e trajnerit të ndjerë Arben Fagu, ai kontribuoi në sukseset e shumta të klubit blu në arenën kombëtare.
Dinamo do të mbetej në histori për rivalitetet e forta me Tiranën, Vllazninë dhe Valbonën, si dhe për episodin e famshëm ku titulli kampion u dorëzua jashtë fushës së lojës.
Pas përfundimit të karrierës si basketbollist, Enea Andrea u përfshi me sukses në gazetarinë sportive si komentator, veçanërisht në ndeshjet e NBA-së dhe Euroligës në Radio Televizionin Shqiptar dhe Tring Sport.
Ai dha kontributin e tij edhe si analist sportiv në emisionin “24 sekonda” të gazetarit Henri Moja në RTSH Sport, duke u vlerësuar për analizat profesionale dhe dinjitoze.
Basketbolli shqiptar humbet sot jo vetëm një ish-sportist të spikatur, por edhe një zë të rëndësishëm të tij.
Qofsh i parajsës, Enea Andrea – një yll që do të ndriçojë përgjithmonë basketbollin shqiptar.
