Një ditë pas arratisjes spektakolare të Altin Ndocit nga spitali i Durrësit, policia dhe prokuroria vazhdojnë hetimet.
Ndërkaq, menjëherë pas ngjarjes së bujshme, dje ka qenë në burgun ku qëndronte i paraburgosur personi me precedentë të shumtë penalë, edhe ministri i Drejtësisë Besfort Lamallari.
Ai ka komunikuar stafit të burgut masën e pezullimit për drejtorin e burgut Indrit Cerloj, nëndrejtorin Julian Agasi, mjeku i këtij institucioni si dhe 7 efektivë të tjerë.
Nga të dhënat e deritanishme bëhet e ditur se arratisja ka qenë e mirëmenduar dhe hetimet janë përqendruar në gjetjen e bashkëpunëtorëve nga brenda burgut.
Në lidhje me vizitën e planifikuar për shtetasin që ndodhej në paraburgim tek reparti infektiv i spitalit, bëhet e ditur se është shkelur protokolli i sigurisë.
Ai është dërguar në spital vetëm nga 5 efektivë të burgut, bashkë me shoferin, ndërkohë që në momentin që drejtohej për tek reparti infektiv ka qenë pa pranga.
Vizita e djeshme e Altin Ndocit në spitalin rajonal ka qenë e pesta në harkun kohor të dy viteve të fundit, gjatë të cilave mendohet se ai ka hartuar me kujdes skemën e arratisjes, e cia besohet se është kryer në bashkëpunim me persona të tjera brenda dhe jashtë burgut.
