Prej kohësh Barcelona është vënë në kërkim të një mbrojtësi të djathtë dhe duket se e ka gjetur lojtarin e duhur. Katalanasit kanë piketuar Andrei Ratiu, mbrojtësin rumun, i cili konsiderohet si një nga zbulimet e këtij sezoni në La Liga, pas paraqitjeve shumë të mira që ka bërë me Vallecanon.
Kontrata e 26-vjeçarit me Vallecano-n skadon në vitin 2028 dhe klauzola e tij e lirimit është 25 milionë euro, por mediat katalanase raportojnë se marrëveshja mes dy klubeve mund të mbyllet për 15-20 milionë euro.
Andrei Ratiu ka spikatur këtë sezon për qëndrueshmërinë e tij mbrojtëse por edhe për aftësitë sulmuese dhe duket se është profili i kërkuar prej kohësh nga Hansi Flick. Ardhja e rumunit mund të hapë rrugën për largimin e Jules Kounde, për të cilin ka interes të madh nga Manchester United. “Djajtë e Kuq” janë të gatshëm të ofrojnë deri në 80 milionë euro për anësorin francez.
Në rast se finalizohet transferimi i Ratiu drejt Barcelonës, ky do jetë një lajm shumë i mirë për Ivan Balliun, pasi rumuni ka fituar vendin e titullarit dhe ka ulur në stol shqiptarin te Vallecano. Ndaj, nëse 26-vjeçari lëviz drejt “Camp Nou”, Balliu do ketë mundësinë të rifitojë vendin e titullarit.
