Mbrëmjen e kaluar, Juela Nikollaj u bë zyrtarisht banorja më e re e Big Brother VIP 5. E lindur në Laç dhe e rritur në Milano.
Ajo ka studiuar Ekonomi Europiane, por vendosi t’i përkushtohej pasionit të saj më të madh: muzikës.
Megjithatë, rrugëtimi i saj nuk ka qenë i lehtë. Në vitin 2020, Juela përjetoi një tragjedi të rëndë personale, kur i fejuari i saj, Vledison Filopati, humbi jetën në një ngjarje të rëndë familjare në Mirditë, ku mbeti e vrarë edhe motra e tij. Motër e vëlla u vranë pranë shtëpisë së tyre nga ish-bashkëshorti i Esmeralda Filopatit, 36 vjeçe, Fatmir Kolecaj, 47 vjeç. Ngjarja tronditi opinionin publik në atë kohë dhe la një plagë të thellë në jetën e saj.
Kjo humbje e madhe, siç është shprehur edhe vetë më herët, e ka bërë Juelën më të fortë dhe më të vetëdijshme për drejtimin që dëshiron t’i japë jetës dhe artit të saj.
Me hyrjen në Big Brother VIP, Juela Nikollaj shpreson që kjo eksperiencë të shënojë një kapitull të ri, jo vetëm në karrierën e saj artistike, por edhe në rrugëtimin personal.
