Ashtu sikurse e kishin paralajmëruar më parë, banorët e Sektorit Rinia në Durrës kanë protestuar këtë të dielë kundër mbetjeve që dyshohen të rrezikshme dhe që janë vendosur pranë banesave të tyre.
Të frikësuar për rrezikun që u kanoset, banorët kërkojnë që mbetjet të largohen nga zona e tyre dhe të dërgohen në një vend larg qendrave të banuara.
“Të largohen këto se janë mbetje të rrezikshme, bota i ka kthyer mbrapsht. Kjo zonë këtu është e banuar, ata na sjellin helm”, tha një banor.
Një tjetër protestues tha: “Ne nuk jemi endacakë, kemi fëmijë, pleq, blegtori. Është e papranueshme të sjellin kontenierët 150 metër larg nga shtëpitë. Nëse nuk janë të dëmshme, përse nuk i mbajti bota?”
Kontenierët që dyshohet se mbajnë lëndë pluhuri nga filtrat e furrave të çelikut të kompanisë KURUM, u nisën me anie në korrik të këtij viti nga Porti i Durrësit me destinacion Taljandën. Pas sinjalizimit që bëri një organizatë ndërkombëtare e specializuar në çështjet e drejtësisë mjedisore, zyrtarët tajlandezë deklaruan se mbetjet nuk do të pranohen në vendin e tyre dhe do të kthehen mbrapsht.
Tashmë 102 kontenierët me mbetje të rrezikshme ndodhen në një ambient të mbikëqyrur nga policia, shumë pranë ECO-Park në Durrës. Deri më tani nuk janë zhvilluar analizat e nevojshme për të mësuar se çfarë lëndësh mbajnë brenda ata.
Banorët paralajmëruan se protestat do të vazhdojnë nëse nuk merren masa për të hequr konternierët nga banesat e tyre.
