Ish-kryeministri i Izraelit, Ehud Olmert, ka thënë se Izraeli po kryen krime lufte në Gaza dhe se “mijëra palestinezë të pafajshëm po vriten, si dhe shumë ushtarë izraelitë”.
Olmert, i cili ishte kryeministri i 12-të i Izraelit nga viti 2006 deri në vitin 2009, shkroi në një artikull opinioni për gazetën dhe faqen e internetit izraelite Haaretz se “qeveria e Izraelit aktualisht po zhvillon një luftë pa qëllim, pa synime apo planifikim të qartë dhe pa shanse për sukses”.
Ai shtoi: “Që nga themelimi i tij, shteti i Izraelit nuk ka zhvilluar kurrë një luftë të tillë… Banda kriminale e kryesuar nga Benjamin Netanyahu ka vendosur një precedent të pashoq në historinë e Izraelit edhe në këtë fushë.”
Ish-kryeministri izraelit dhe ish-anëtar i Likud, e njëjta parti si Netanyahu, shkroi se “viktimat e pakuptimta midis popullsisë palestineze” po arrinin “përmasa monstruoze” në javët e fundit, shkruan The Guardian.
“Operacionet e fundit në Gaza nuk kanë të bëjnë fare me qëllime legjitime të luftës”, shkroi ai. “Kjo tani është një luftë politike private. Rezultati i saj i menjëhershëm është transformimi i Gazës në një zonë katastrofe humanitare”.
Olmert tha se ai shpesh kishte pohuar se Izraeli nuk po kryente krime lufte në Gaza dhe pohoi me bindje se “në asnjë rast një zyrtar qeveritar nuk dha urdhra për të goditur civilët e Gazës pa dallim”.
Megjithatë, në javët e fundit, “nuk kam qenë më në gjendje ta bëj këtë”, tha ai. “Ajo që po bëjmë tani në Gaza është një luftë shkatërrimtare: vrasje pa dallim, e pakufizuar, mizore dhe kriminale e civilëve. Është rezultat i politikës qeveritare – e diktuar me vetëdije, ligësisht, keqdashje dhe papërgjegjshmëri.”
“Po, Izraeli po kryen krime lufte”, përfundoi ai.
Në një intervistë me BBC javën e kaluar, Olmert e përshkroi konfliktin e vazhdueshëm si “një luftë pa qëllim, një luftë pa shans për të arritur diçka që mund të shpëtojë jetën e pengjeve”.
Komentet e tij për transmetuesin britanik shkaktuan një debat në Izrael. Partitë e ekstremit të djathtë dënuan fjalët e tij, të cilat pasuan deklaratat e kreut të partisë Demokratike, Yair Golan, një ish-zëvendësshef i shtabit të ushtrisë izraelite, i cili i tha transmetuesit kombëtar Kan se “një vend i shëndoshë mendërisht nuk lufton kundër civilëve, nuk vret foshnje si hobi dhe nuk i vë vetes si qëllim dëbimin e popullatave”.
Ministri i Jashtëm izraelit, Gideon Sa’ar, akuzoi Olmertin dhe Golanin se “kanë marrë pjesë aktive në një fushatë diplomatike, në një luftë propagandistike dhe në një luftë ligjore kundër shtetit të Izraelit dhe IDF-së”.
Disa media izraelite i kanë paraqitur komentet e Olmertit si një përgjigje ndaj zemërimit të ekstremit të djathtë për rifillimin e ndihmës në Gaza dhe ndaj retorikës nxitëse të disa politikanëve izraelitë.
