Kryetari i Grupit Parlamentar të Partisë Demokratike, Gazment Bardhi, ka reaguar ashpër pas mungesës së zëvendëskryeministres dhe ministres së Infrastrukturës, Belinda Balluku, në mbledhjet e komisioneve parlamentare të së mërkurës.
Në një deklaratë publike, Bardhi tha se të gjithë ministrat ishin të pranishëm në komisionet përkatëse, përveç “të pandehurës Belinda Balluku”, siç e quajti ai.
Kryedemokrati në Kuvend theksoi se Balluku duhet të largohet menjëherë nga detyra, duke shtuar se “nuk mund të fshihet pafundësisht nga Kuvendi, as pas frikës që ka kapur ‘Palloshin e gjatë’, të cilin e ka marrë peng”.
Postimi i Bardhit:
Sot të gjithë ministrat, në ushtrim të përgjegjësisë së tyre sipas nenit 80 të Kushtetutës dhe nenit 80, pika 1 të Rregullores së Kuvendit, ishin prezent në mbledhjet e Komisioneve Parlamentare që mbulojnë fushën e tyre të përgjegjësisë.
E vetmja që u fsheh ishte E PANDEHURA nga SPAK Belinda Balluku!
E pandehura Balluku nuk mund të sillet sikur asgjë s’ka ndodhur, vetëm për faktin se ajo e di që Edi Rama është peng i korrupsionit të tij dhe nuk mund ta shkarkojë. E pandehura Balluku duhet të largohet menjëherë nga detyra sepse nuk mund të fshihet pafundësisht nga Kuvendi. Ajo nuk mund të fshihet as pas frikës që ka kapur “Palloshin e gjatë”, të cilin e ka marrë peng!
Llogaridhënia është baza e qeverisjes demokratike. Çdo aferë korruptive është taksë e fshehur që i vihet qytetarit shqiptar. Është pengesë për zhvillimin e vendit. Shkon kundër mirëqenies. Është një hap më shumë drejt largimit të të rinjve nga Shqipëria.
