Ditën e djeshme, avokati Ulian Barjami është arrestuar në Elbasan pas seancës gjyqësore ku përfaqësonte klientin e tij, Maksim Suçin, pjesë e grupit prej 14 personash të arrestuar më parë në një lokal të qytetit.
Sipas tij, procesverbali i paraqitur në gjykatë nuk pasqyronte realitetin e ngjarjes, ku klienti nuk kishte ushtruar dhunë ndaj punonjësve të policisë.
Reagimi i prokurori ka qenë duke urdhëruar arrestimin e avokatit dhe duke përfshirë policinë gjyqësore. Pas disa orësh në komisariat, Barjami u ndalua zyrtarisht për akuzat: “Kanosja për shkak të detyrës”, “Kundërshtimi dhe goditja e gjyqtarit” dhe “Kanosja e gjyqtarit”.
Ndërkohë Dhoma Kombëtare e Avokatisë së Shqipërisë ka dënuar arrestimin, duke e konsideruar atë një akt të paprecedentë që cenon lirinë e fjalës së avokatëve gjatë ushtrimit të detyrës në sallën e gjykatës. Në një deklaratë zyrtare, Dhoma ka kërkuar ndërhyrjen e menjëhershme të Inspektorit të Lartë të Drejtësisë dhe të Prokurorisë së Përgjithshme për të hetuar këtë rast, duke theksuar se nuk mund të lejohet që avokatët të ndëshkohen për shprehjen e mendimit në kuadër të mbrojtjes ligjore.
