Më 7 dhjetor 2025, një avion i linjës Prishtinë–Stamboll doli nga rruga e taksimit në Aeroportin Sabiha Gökçen, duke u ndalur në skajin e pistës. Ngjarja shkaktoi shqetësim tek udhëtarët, por fatmirësisht nuk pati persona të lënduar.
Aeroplani, një Boeing 737-800 i kompanisë AJet, me numër fluturimi TKJ76Q / VF102, kishte kryer një ulje normale. Sipas deklaratës së linjës ajrore, gjatë taksimit mjeti ajror doli në terren të butë, si pasojë e reshjeve të dendura të shiut që kishin prekur zonën.
Të gjithë pasagjerët u evakuuan në mënyrë të sigurt dhe pa përdorur rrëshqitësit emergjentë, ndërsa largimi i tyre nga aeroporti u krye me procedura të rregullta.
Incidenti solli vonesa dhe devijime të disa fluturimeve në aeroport, duke shkaktuar ngarkesë të shtuar për operatorët dhe shqetësim për udhëtarët. Ambasada e Kosovës në Ankara njoftoi se ka monitoruar situatën nga afër dhe ka ofruar informacione të vazhdueshme për sigurinë e pasagjerëve dhe zhvillimet pas ngjarjes.
