Autoritetet në Estoni e konsiderojnë një provokim serioz dhe të papranueshëm veprimin e Moskës ndërsa kritika kishte edhe nga vetë Aleanca e cila u shpreh se Rusia po tregon pamaturi.
Kryeministri i Estonisë, Kristen Michal, ka deklaruar se NATO duhet të jetë e bashkuar ndaj çdo provokimi ndërsa shumë vende janë shqetësuar nga provokimet ruse.
Kreu i Shtëpisë së Bardhë, Donald Trump, ka reaguar duke thënë se kjo situatë mund të jetë një telash i madh ndërsa edhe liderët europianë janë shqetësuar.
Presidenti i Francës, Emmanuel Macron, ka dënuar gjithashtu ndërhyrjen e avionëve rusë në Estoni një ditë më parë.
Sekretari britanik i Mbrojtjes, John Healey ka deklaruar se ky është një tjetër plan provokues i Vladimir Putin, ndërsa ka theksuar se agresioni i tij shërben vetëm për të forcuar NATO-n.
Përtej kësaj, Rusia nga ana tjetër mohon akuzat ndërsa Ministria e Mbrojtjes në Moskë ka deklaruar se fluturimi i avionëve u krye në përputhje të plotë me rregullat ndërkombëtare.
Çfarë është Neni 4 i NATO-s dhe pse po e aktivizon Estonia?
Neni 4 i Traktatit të NATO-s është një mjet diplomatik që i lejon çdo vendi anëtar të kërkojë konsultime urgjente me aleatët, nëse ndjen se siguria e tij është e kërcënuar. Ky nen nuk nënkupton automatikisht luftë apo ndërhyrje ushtarake, por hap rrugën për diskutime të nivelit të lartë brenda Aleancës për situata të rrezikshme që prekin një ose më shumë anëtarë.
Sipas vetë përkufizimit nga Traktati i Uashingtonit (1949), Neni 4 mund të aktivizohet kur një shtet anëtar beson se po kërcënohet integriteti i tij territorial, siguria kombëtare apo pavarësia politike.
Në rastin e fundit, Estonia po e përdor këtë nen si një sinjal alarmi, pas shkeljes së hapësirës së saj ajrore nga avionë rusë. Përballë një situate që ajo e konsideron “serioze dhe”, Estonia po kërkon të përfshijë zyrtarisht NATO-n në diskutime për masat e mundshme mbrojtëse apo parandaluese.
