Dy djemtë e familjes së madhe Demiraj ndodhet prej mbrëmjes së djeshme në spital, për shkak të breshërisë së plumbave që u derdh ndaj mjetit Mercedes Benz G Class ku ata udhëtonin bashkë me një shokun e tyre dhe shoferin e familjes.
Neësbomb.al ka arritur të mësojë ekskluzivisht se 11 vjeçari që ndodhet në gjendje kritike për jetën në Spitalin e Traumës, Dior Demiraj, është djali i vogël dhe jo nipi i Vesel Selimaj.
Ndërkohë, i plagosur ka mbetur dhe djali i madh i familjes së presidentit të kompanisë private të sigurimit fizik “Pelikani Security”, Vesel Demiraj, 17 vjeçari Marko Demiraj. Ai është prekur nga plumbat, por ndodhet në gjendje më të stabilizuar se vëllai i vogël.
Bashkë me ta në makinë si pasagjer ka qenë dhe shoku 19 vjeçar Kian Mullaj, ndërkohë drejtimin e mjetit e kishte shoferi i familjes Demiraj, 34 vjeçari Arenc Stafa.
Tre të miturit kishin dalë të festonin ditëlindjen e 11 vjeçarit Dior Demiraj në fshatin Pjezë të Shijakut dhe po ktheheshin në Lundër, kur pas tyre është vënë një fuoristradë me të paktën tre persona, të cilët kanë hapur zjarr me breshëri.
Plumbat kanë vazhduar për qindra metra në drejtim të makinës Mercedes Benz G Class dhe në një moment kur dhe shoferi është prekur nga plumbat, ka përfunduar jashtë rruge. Autorët janë larguar me shpejtësi, ndërsa katër të plagosurit janë dërguar me urgjencë në spital.
Arsyet mbeten enigmë. Tre personat e plagosur, veç 11 vjeçarit që është rëndë në spital, kanë thënë se nuk kanë pasur konflikt me asnjë person. Madje, edhe ditën e djeshme kur kishin dalë për të festuar ditëlindjen e 11 vjeçarit Dior Demiraj, ata kanë thënë se nuk ka ndodhur asnjë sherr.
Gjatë marrjes paraprake në pyetje, edhe shoferi Arenc Stafa ka deklaruar se nuk kishte asnjë konflikt dhe nuk e dinte arsyen e atentatit.
Një ndër pistat që po hetohet është dhe ajo se autorët mund të kenë ngatërruar shënjestër. Megjithatë, ka deklarime se automjeti Mercedes Benz G Class është ndjekur në një distancë të gjatë nga autorët dhe këta të fundit kanë vazhduar të qëllojnë me breshëri përgjatë itinerarit, kur mjetet ishin në lëvizje.
Po ashtu, një tjetër detaj që e rrëzon këtë pistë është fakti se makina ka qenë e loguar me logon e kompanisë “Pelikani Security” dhe autorët nuk e kanë pasur të vështirë ta dallonin. Duke qenë se e kanë ndjekur mjetin, ata po ashtu e kanë ditur se kush ndodhej brenda tij.
11 vjeçari Dior Demiraj ka dalë nga operacioni pas disa orësh, qëkur u dërgua me urgjencë në Spitalin e Traumës mbrëmjen e djeshme, por po mbahet nën kujdes intensiv nga mjekët sepse është në gjendje kritike për jetën.
