Tre shtetas shqiptarë janë arrestuar nga policia belge pasi dyshohen si autorë të të paktën pesë vjedhjeve, në zonën e Puurs-Sint-Amands, Temse dhe Dilbeek.
Sipas autoriteteve, të dyshuarit u kapën ndërsa po flinin në sediljen e pasme të automjetit të tyre.
Makina ishte shpallur në kërkim, pasi ishte vënë re pranë disa banesave ku ishin raportuar vjedhje. Në një prej rasteve, një fqinj kishte arritur të fotografonte automjetin, duke ndihmuar në identifikimin e tyre.
Gjatë kontrollit të makinës, policia gjeti mjete për vjedhje, si dhe sende të ndryshme të dyshuara si të vjedhura, përfshirë monedha ari, bizhuteri, parfume, një xhaketë dhe çanta dore.
Sipas prokurorisë, një pjesë e këtyre sendeve lidhet drejtpërdrejt me pesë raste vjedhjesh, ndërsa të tjera mbeten ende pa pronar të identifikuar, çka ngre dyshime për përfshirjen e tyre në më shumë ngjarje kriminale.
Sipas raportimeve, hetimet u ndihmuan ndjeshëm nga të dhënat e lokalizimit të telefonit të njërit prej të arrestuarve, një 25-vjeçar shqiptar, i cili kishte lënë aktiv funksionin e gjurmimit. Kjo i lejoi policisë ta lidhte atë me vendet ku kishin ndodhur vjedhjet.
Pas arrestimit, tre të rinjtë u morën në pyetje dhe u dërguan në paraburgim. Ata nuk i mohuan akuzat dhe deklaruan se kishin lënë vendin e tyre me synimin për të punuar në Mbretërisë së Bashkuar, por sipas mbrojtjes, ishin mashtruar nga personi që do t’i ndihmonte të udhëtonin atje.
Avokatët mbrojtës deklaruan se të rinjtë përfunduan në Belgjikë pa para dhe pa ushqim, çka, sipas tyre, i shtyu drejt vjedhjeve. Ata kanë kërkuar falje për veprimet e tyre, ndërsa mbrojtja ka kërkuar një dënim me kusht.
Prokuroria ka kërkuar 18 muaj burg efektiv për secilin prej tyre, ndërsa vendimi i gjykatës pritet të shpallet më 4 maj.
