Një 36-vjeçar shqiptar, i shpallur në kërkim për të paktën 12 vjedhje banesash, është ekstraduar nga Spanja drejt Italisë dhe është dorëzuar dje në mëngjes në aeroportin e Milano Linate nga autoritetet spanjolle.
Për 36-vjeçarin u lëshua një mandat evropian arresti, i lëshuar nga Prokuroria e Milanos, për veprat penale të pjesëmarrjes në organizatë kriminale, vjedhje në banesa dhe trafik mallrash të vjedhura.
Hetimet, të zhvilluara nga Njësia Hetimore e Milanos (Squadra Mobile), nisën pas zbulimit të një automjeti të vjedhur me vlerë të lartë, që dyshohet se u përdor nga grupi për lëvizjet gjatë kryerjes së vjedhjeve.
Vetëm gjatë muajit nëntor 2024, grupi akuzohet për të paktën 12 vjedhje, të dokumentuara përmes vëzhgimeve operative dhe përgjimeve ambientale brenda automjeteve të përdorura.
Në dhjetor 2024, dy prej pjesëtarëve të grupit, gjithashtu shtetas shqiptarë, u kapën në provincën Monza Brianza, ndërsa i treti arriti të arratisej dhe u shpall në kërkim ndërkombëtar. Pas më shumë se tetë muajsh arrati, ai u lokalizua dhe u arrestua në Spanjë.Pas mbërritjes në Itali, Policia Kufitare në Linate i njoftoi urdhrin e arrestit, dhe shqiptari u shoqërua në burgun e Monzës, ku do të përballet me drejtësinë italiane.
