Australia po e përfshin zyrtarisht YouTube-in në ndalimin e rrjeteve sociale për fëmijët nën 16 vjeç, duke përmbysur qëndrimin e mëparshëm, që e trajtonte atë si një platformë edukative.
Duke filluar nga dhjetori që vjen, platforma si YouTube, Instagram, TikTok, Snapchat dhe X do të detyrohen të bllokojnë krijimin e llogarive nga persona nën moshë, përndryshe do të përballen me gjoba deri në 32 milionë dollarë. YouTube Kids do të përjashtohet nga kjo masë.
Ky ndryshim vjen pas një raporti të mbështetur nga qeveria, i cili tregoi se 37% e fëmijëve kishin hasur përmbajtje të dëmshme në YouTube. Zyrtarët thonë se kjo bëhet për të mbrojtur fëmijët nga një botë dixhitale që është bërë shumë e rrezikshme për ta lënë pa kontroll.
