Më 24 janar, shitjet në Kroaci ranë pas një bojkoti të gjerë të blerjeve, në protestë ndaj rritjes së çmimeve të produkteve ushqimore dhe inflacionit të lartë. Shifrat zyrtare treguan se dyqanet kishin shënuar 40% më pak fatura deri në orën 11:00, ndërsa qarkullimi kishte rënë 47% krahasuar me javën e kaluar.
Protesta, e organizuar nga grupet e konsumatorëve dhe e shpërndarë përmes rrjeteve sociale, kërkonte të ushtronte presion ndaj shitësve me pakicë, të cilët akuzohen për rritjen e çmimeve. Thirrja ishte që kroatët të “mos blenin asgjë” për të shprehur pakënaqësinë e tyre ndaj çmimeve të larta.
Në një supermarket të Zagrebit, mëngjesin e 24 janarit, numri i blerësve ishte dukshëm i ulët, ndërkohë që ekspertët thonë se bojkoti kishte një mesazh simbolik më shumë se një ndikim financiar të drejtpërdrejtë për shitësit.
Bojkoti mori mbështetje nga opozita, sindikatat dhe figura të njohura, duke nxitur reagime nga konsumatorët të cilët ndihen të mashtruar nga rritja e çmimeve. Josip Kelemen, nga grupi për mbrojtjen e konsumatorëve, tha se ky bojkot e tronditi tregun dhe se qytetarët po e vlerësojnë se disa çmime janë të papranueshme, veçanërisht duke pasur parasysh krahasimet me çmimet jashtë vendit.
Kryeministri kroat, Andrej Plenković, e quajti bojkotin një mesazh të rëndësishëm dhe nënvizoi se Qeveria do të shqyrtojë masa të mundshme për kufizimin e çmimeve për disa produkte. Në dhjetor, inflacioni në Kroaci arriti në 4.5%, më i larti në Eurozonë, ndërkohë që paga mesatare neto ishte 1 366 euro.
