Një ndeshje spektakolare pritet sot në “Emirates Stadium”, ku Arsenali do të përballet me Atletico Madridin në javën e tretë të Champions League. Në prag të sfidës, trajneri i londinezëve, Mikel Arteta, foli me respekt dhe admirim për kolegun e tij, Diego Simeone.
“Diego Simeone është një person që e admiroj vërtet dhe nga i cili kam mësuar shumë në situata të ndryshme,” – tha Arteta.
“Ajo që më impresionon më shumë është pasioni i tij. Ka shumë vite në futboll, në të njëjtin klub, me shumë nga të njëjtët lojtarë, dhe sërish arrin të transmetojë energji, urinë për fitore dhe dominim. Në një ambient kaq kërkues, të mbash gjallë motivimin e skuadrës tregon se je i jashtëzakonshëm.”
Arteta pranoi se nuk e njeh personalisht Simeonen, por e respekton thellësisht për mënyrën se si ka ndërtuar një identitet të fortë te Atletico:
“Niveli i qëndrueshmërisë, etika e punës, dhe ajo që ai u jep lojtarëve është shumë e vështirë për t’u arritur. Ka krijuar një mentalitet fitues që ende funksionon sot.”
I pyetur për mundësinë që Simeone të kalojë ndonjëherë në Premier League, Arteta u përgjigj:
“Nëse ndodh, do ta bëjë kampionatin edhe më të fortë. Gjithçka varet nga ai, nëse do ta pranojë një ditë atë sfidë. Nga ajo që kam parë, skuadrat e tij janë gjithmonë jashtëzakonisht të përgatitura.”
Ndeshja Arsenal–Atletico Madrid zhvillohet sot në “Emirates Stadium”. Aktualisht “Topçinjtë” renditen në vendin e pestë të grupit me 6 pikë, pas fitoreve ndaj Athletic Bilbaos dhe Olympiacosit.
