Presidenti i Polonisë, Karol Nawrotski, ka bërë një deklaratë të fortë duke kërkuar zhvillimin e një programi të armëve bërthamore, në kushtet e rritjes së kërcënimit nga Rusia.
Në një intervistë për Polsatnews, ai theksoi se ndërtimi i një kapaciteti bërthamor do të ishte një hap strategjik për sigurinë kombëtare, duke garantuar se Polonia do të respektojë të gjitha rregulloret dhe marrëveshjet ndërkombëtare.
Nawrotski, i cili mban edhe postin e komandantit të përgjithshëm të forcave të armatosura, vuri në dukje pozicionin gjeografik të Polonisë, duke theksuar afërsinë me Ukrainën dhe Bjellorusinë – dy pika kyçe të tensioneve aktuale. Ai nuk dha një afat konkret për nisjen e një
programi të tillë, por paralajmëroi se një reagim agresiv nga Rusia do të ishte i pritshëm nëse Polonia do të ndërmerrte hapa konkretë.
Deklaratat e presidentit kanë shkaktuar rezerva brenda qeverisë polake. Ministri i Mbrojtjes, Władysław Koszyniak, e cilësoi çështjen e armëve bërthamore si “më të ndjeshmen nga të gjitha çështjet e ndjeshme”.
Ai theksoi se zhvillimi i kapaciteteve kërkimore dhe teknologjike është thelbësor dhe se veprimet konkrete kanë më shumë peshë sesa deklaratat publike.
Si anëtare e Bashkimi Evropian dhe NATO, Polonia mbetet një aleate e fortë e Ukrainës dhe ka mbajtur një qëndrim të ashpër për sigurinë rajonale.
Ky pozicion është më i avancuar krahasuar me atë të ish-presidentit Andrzej Duda, i cili në vitin 2024 kishte sugjeruar që Polonia të ishte e gatshme të strehonte armë bërthamore amerikane në kuadër të ndarjes bërthamore të NATO-s.
Megjithatë, Aleanca ka bërë të ditur se aktualisht nuk ka plane për vendosjen e armëve bërthamore në territorin polak.
Historikisht, Shtetet e Bashkuara kanë mbajtur armë bërthamore në disa vende evropiane, përfshirë Gjermaninë, Holandën, Belgjikën, Italinë dhe Turqinë, edhe pse vendndodhjet e sakta nuk janë konfirmuar zyrtarisht.
Kjo situatë e bën edhe më kompleks dhe të tensionuar panoramën e sigurisë në Evropë, në një moment kur balancat gjeopolitike mbeten tepër të brishta.
