Ish-ministri i Drejtësisë i Kosovës, Hajredin Kuçi, është arrestuar me urdhër të Gjykatës Speciale. Sipas raportimeve nga mediat kosovare, gjithashtu janë ndaluar Bashkim Smakaj, ish-kryetar i Agjencisë së Kosovës për Inteligjencë (AKI), dhe Isni Kilaj, ish-kryetar i Komunës së Malishevës, si dhe Fadil Fazliu, vëllai i heronjve Fahri dhe Bahri Fazliu.
Djali i Fadil Fazliut, Fahriu, ka deklaruar para mediave se arrestimi i babait të tij ka ndodhur kur ai ishte duke shkuar për në punë. Sipas Fahriut, Fadili ka qenë pjesë e UÇK-së dhe është vëllai i dy heronjve të rënë, Fahri dhe Bahri Fazliu.
Zyra e Prokurorit të Specializuar (ZPS) ka njoftuar se po kryhen operacione hetimore të vazhdueshme në Kosovë për vepra penale kundër administratës së drejtësisë. Operacionet janë autorizuar nga Dhomat e Specializuara të Kosovës (DHSK) dhe mbështetur nga Misioni i Bashkimit Evropian për Sundimin e Ligjit në Kosovë (EULEX).
